I Noreg er me leiande på utviklinga av nye teknologiar for grøn omstilling av skipsfarten. Norske bedrifter er stadig dei første til å demonstrera nye låg- og nullutsleppsløysingar til sjøs. Dette trengst for at skipsfarten skal møta både norske og internasjonale utsleppskrav og klimamål.
Her har Noreg eit godt utgangspunkt for å bygga verdiskaping og grøn eksport, men kva hindrar oss i å realisera dette? Korleis sikrar me at bedriftene klarer å kommersialisera teknologiane og å ta internasjonale marknadsposisjonar? Og korleis hindrar me teknologilekkasjar? Mange utanlandske aktørar pustar oss no i nakken: Korleis unngår me å forbli «pilotlandet»? Korleis utnyttar me moglegheitene i ein marknad der investorar og bankar no krev grøne løysingar?
Til debatten kjem næringsministeren som nyleg har lansert Noregs nye eksportsatsing. Her kjem fleire politikarar, representantar frå både kapitalsektoren og verkemiddelapparatet, og ikkje minst næringsaktørar som er klare til å erobra verda med norskutvikla miljøteknologiar. Maritime CleanTech ønsker velkomen!
